舊事補發：三杯小平台爆發之旅

過年期間眼見個個釣到盆滿缽滿，唔抵得，初五同老婆請假落去台山博下。初五夥同肥佳，落去銅鼓同已經釣左兩日的釣友會合拼船。個個話怕過年爭位，話早早落去出船，結果搞到凌晨2點半要集合，3點出車，結果在濃霧中慢慢行駛到左銅鼓碼頭都係4點半，第一次見到一個漆黑的銅鼓碼頭，我地系第一台車，呢陣時打電話比系度過夜的釣友，發現全部還在訓教。我撲距媽個XX。。。。。。。（此處省略30個字不連貫的粗口），叫我地5點前趕到碼頭自己還在訓教。好了，唔講甘多閒話。經過半個鐘開粉換衫準備，各位釣友和船師傅都已經抵達，好hi心甘上左船直奔三杯（由於多日大風突然回南，此時正是三杯的好時機）。

以為甘早去到可以搶翻幾個名礁釣下，結果去到發現幾個出水獨礁全部已被荷包過來的船霸佔（我頂，天都未光都唔知距地點樣開船的，佩服膽量）。無奈幾個釣友先撿左2號大礁上左（由於一個本地叫光仔的釣友好喜歡上，我地後來都統稱光仔石^-^）。剩低我同肥佳你眼望我眼，一于殺落去最南面的獨礁啦。結果去到發現最南礁（17號位）依然系被珠海佬霸佔，無計，只可以上隔離的倒數16號石。問下肥佳個位有無釣過，回答話曾經幸福過，無惗甘多，睇落位置都好靚，一于上礁啦。肥佳由於體型問題，上去只能霸佔了上船位作釣。我就由於陌生礁石，上黎后就到處亂爬睇釣位，發現礁石正面近水有一個好長的平台，位置好靚，但係估計會過浪，睇睇潮汐，剛開始漲潮，還可以爬落去釣兩個鐘。

落去見到個位系一個大攪流位，正面離礁石30米有兩塊大的暗礁時常露出水面，水流非常生猛，系個好地方。一于快快開竿，開竿前整左十幾個深水炸彈落去，聚攏魚群。釣棚：試水之後腳邊1-2米水深5米，1竹遠處已經8米，有個較大的級差就在一桿遠，非常好的距離，可以釣得好舒服。釣組：鎖級差，決定用負浮釣組，5B宮之蒲松田款波，5B配重環，先選擇子線兩粒G2微負浮，試水幾下后發現流大下沉不理想，換2粒B鉛均勻夾子線。釣竿：Gamakatsu G4 Intessa 2#-53。钓线：Varivas 3# Zerofukase Special半浮主线，Varivas 365 2# 脚。钓位钓法：钓位处于两个抄涌反拨流的中间，两边流向还系对头，由两个唔同的抄白位带出汇集，钓位系中间一块相对静止的水域，自己在左侧较大的炒涌边落钓组，打粉亦打在左边抄涌边，等左边发拨流带动钓组慢慢飘向与右边反拨流的会合点，过左汇合点带流速加快就回收釣組重新放。

開始又係硬蝦仁探路，落水一陣拿起，發現無消餌，但係蝦仁冰涼，水溫較低，心裡有少少猶豫，好怕水溫低唔開口。正在心上心落的時候，突然拉桿飲水，都幾有力度，以為系大物，強攻之下幾秒升水，一条2.X斤白蜡出水。钓组系下沉半路中鱼，系升水抢食，水底应该还有鱼群。换落南极虾继续，几分钟内再中一条2斤黑沙。之后大半个钟连中5口1-2斤的黑沙，魚情尚算可以。釣釣下約摸過左個鐘到潮水突然變猛，我企的近水平台瞬間過水，對鞋全部打濕，回頭睇睇個水坉，幣，得翻條白蠟和條黑沙系度，其它全部被浪湧打走左。唔系好捨得呢個靚位，於是抬頭睇睇可否爬高，但係背後全部系直壁，連爬都無辦法爬。但係還系比細心的我發現，頭頂正上方有少少突出的石頭位置，應該可以企到人，但係要從上船位爬上山再爬翻落去，好辛苦。呢個時候唔顧得甘多了，水底還有大波魚群等緊我，執好野快快爬山上去。落去的過程比較驚險，有個斷壁位需要爬幾次把釣具一件件遞落去（建議新晉釣友唔好學，有一定風險）。

好辛苦卒之爬到突出石，發現比在下一層觀察的情況更理想，個小平台比想象中的大和平，餌粉、抄網全部都好好擺放，但就係比腳底近水平台高左3-4米，離水好高，要6米長抄網先至有得玩。頭先轉位停左一輪誘餌，搞掂好后快快補落左幾個深水炸彈落去左邊抄涌位，開竿，繼續讓反撥流帶釣組去中間匯合點。發現釣組突然定住唔郁，條主線亦已繃緊，但係桿頭就無拉拖，輕輕抽一下之後突然開始暴走，直奔兩組暗礁中間去，力度蠻橫，應該系大白蠟，呢條魚出走的力度好大，G4都已經滿弓，好在面前水域開闊且平整，經過大約分幾種打八字、蹲放的對抗，條魚漸拜下風，我開始可以慢慢收線翻黎，慢慢魚到左腳邊，浮波亦已經出水，心中暗喜，就在呢陣時條魚突然猛扎入水底，我就強頂一手不放，但係突然桿頭一松，浮波飛起，檢查系爆口。

盡快換好鉤，補打幾勺粉，釣組去到兩流交匯處又係停住，我知道肯定又係距，怕再度爆口，於是用力揚竿，刺中后條魚向右直鏟右邊抄涌暗礁，我手持G4即刻橫桿頂住，順便打左半個八字，條魚果然掉頭衝向左邊，經過在面前幾下橫切，我逐漸都控制住條魚，慢慢將距升水，但係遇到頭先一樣的結果，當浮波啱出水，條魚又係奮力猛扎入水，跟住就脫口，上黎發現還系爆口，估計都係水溫低，條魚食得好淺，容易爆口。之後又有一口同樣位置中魚，但係由於心急，收線攪多左幾手，條魚同時亦在發力，無好好緩沖，再次爆一口。現時為止已經爆口3條大物，太可惜了。

同時自己同大物對抗（每條都弓足分鐘），亦氣喘吁吁，休息幾分鐘后繼續落餌，同時多打左幾勺粉，去到匯流位，繼續系果個結果，釣組突然停低，今次我決定改變下策略，慢慢來，唔急，等距食深。結果果然，等多幾秒后條魚自己猛衝拖桿，我再用力揚竿，過程中我亦唔頂得太恒，慢慢等支竿去緩衝，條魚下壓的時間亦唔理距割唔割線了，都放一手比距去，手肘和腰碼的動作亦盡量輕柔d，經過大約分半中的對抗，條魚終於上水，原來系大牛屎，但係體長好長，用個50cm的抄網落去抄居然還長過網框，哇，6斤打上都有啦。用魚箱養好條魚之後，繼續開釣，同樣用緩和的收發繼續收多一條50cm左右的牛屎。個幾鐘連續中5條甘大的大物，體力有d不支，用電台問問肥佳果邊有無料到，回答話未有乜似樣的魚，同距介紹左釣況后，距不顧體型的龐大，機敏捷甘飛簷走石爬到過離小平台。介紹左中魚過程后，肥佳亦在平台中左5口大物，但係有4口割線，只起到一條50cm+的大牛屎。

我已經體力不支，坐低飲下咖啡食下包，休息左半個鐘，唔想再釣蠟了，走到去左邊轉角位放流中間條水道，又釣左十幾條大黃雞，最大的過斤重，今日真係人品大爆發，45cm養魚桶已經滿曬。

阳江漠南	2016-06-07 18:19
有解图好帖牛牛呀

1魚	2016-06-07 22:54
聽到流晒口水,好耐冇釣過兩斤以上的大魚了....

itit	2016-06-07 23:19
兩斤以上的魚,流晒口水

3901	2016-06-07 23:20
過年期間眼見個個釣到盆滿缽滿，唔抵得，初五同老婆請假落去台山博下。師兄都好舊下喎？！驚當時發帖後冇位企？

lfyyy	2016-06-08 09:17
系啊系啊，唔好甘快發帖住，但係拖拖下就到現在了。

車手8899	2016-06-08 11:17
好貼!好耐冇見過兩斤頭的鱲魚了

李四	2016-06-08 11:17
引用 *引用第 4 樓 3901 於 2016-06-07 23:20* 發表的 :** 過年期間眼見個個釣到盆滿缽滿，唔抵得，初五同老婆請假落去台山博下。師兄都好舊下喎？！驚當時發帖後冇位企？

鱗光一閃	2016-06-08 11:30
好耐冇睇過五千字的文章了

1魚	2016-06-08 11:47
今日釣左兩斤手指咁大既立魚30條

路亞添	2016-06-08 11:49
我也好耐無手持G4,力頂大物！59.1cm巨牛好力

开心笑	2016-06-08 12:11
師兄好帖！有图好

漁樂多多	2016-06-08 16:36
大師好分享

傑仔	2016-06-08 21:09
好多字，忍住睇晒師兄利害

lfyyy	2016-06-12 09:42
好似啰嗦得制，下次我會精簡d

路過...	2016-06-17 13:36
好大碌屎呀

查看完整版本: [-- 舊事補發：三杯小平台爆發之旅 --] [-- top --]

Powered by PHPWind v7.5 SP3 Code ©2003-2010 PHPWind
Time 0.015068 second(s),query:2 Gzip disabled

You can contact us