| jackie |
2006-08-29 23:52 |
何翁预言非乱噏 一言成谶人心噏 转自讯报
●克仔，唔见你成个礼拜，你无乜事吗？
●老冯，我好人好者，有乜事呀？
●无，我见香港何俊仁畀人打咗镬金，我惊你又有事啫！
●唔驶惊，佢系议员，政敌就当然多啦！再加上佢喺香港，我喺澳门，又有乜关系！
●你当我多口问吓啰！不过香港方面盛传何俊仁被打系因为律师事务，而唔系政治原因！据说佢其中一单港澳闻名纠缠多年嘅官司中，已经有几个律师被打，再加上上个礼拜你又指称何翁一句：“唔好以为澳门咁和平”系出言不逊，既有负于澳门市民，更有负于何厚铧；所以我先至担心你啫！
●我知啦！香港方面不断暗示系澳门一位大商家做嘅！不过我有三个理由唔相信系佢做：第一、同姓三分亲，切肉都不离皮，所谓三千年前是一家，又岂会同室操弋呢？第二、所以话发财立品，佢发嘅系大财，而且发咗咁多年，品就一定唔错，有品就自然知书识礼，又点会郁手打人，就算真系错手打咗，有品嘅人自然有承担，又点会唔认打人呀？第三、通常有品嘅人唔讲大话，佢都话明立法会所有议员佢都识，就系唔识何俊仁一个，讲得咁清楚，佢又点可能系搵人打佢嘅原凶吖？
●今次我就唔同意你嘅讲法喇！第一．佢连兄妹都会搞到告上法庭，所谓同姓三分亲切肉不离皮论据唔成立；第二．你话佢有承担我亦有保留，就睇吓佢班伙计罗列咗一大箩文件，证明佢地多年假期被剥削而告上法庭要求赔偿，结果佢输咗又上诉，上诉完又上诉，情愿花律师费，都唔肯公公道道补畀Ｄ旧伙计！第三．至于唔讲大话我就更唔认同，当年董建华当政，佢就不断叫人买楼，话董建华嘅八万五政策令楼市开始上升，结果董建华一落台佢就公开表示为咗要支持董建华，所以讲咗七年大话，如果成个立法会五十九个议员佢都认识，只系唔认识何俊仁一个，我唔知呢Ｄ系咪此地无银三百两嘅香港版！
●算啦！我地都系讲番澳门啦！话说何翁一句：“唔好以为澳门咁和平”言犹在耳，马上有两名赌厅负责人横尸珠海，一开始以为系劫杀案，点知查查吓又发现系赌厅争生意所致，再加上警方喺呢个礼拜喺香港同澳门码头分别禁止同遣返咗一批涉嫌为呢单命案而到澳门有所动作嘅社团份子，似乎又一次证明咗何翁嘅预言能力！
●不过今次警方都值得一赞，咁快就可以兜截到呢批人，否则后果不堪设想！
●我就认为无乜用，因为何厚铧一直都缩埋一边，如果佢唔出嚟表态，话畀Ｄ黑社会知唔可以喺澳门乱嚟，我相信永利同星际开埋之后，何翁嘅预言就好快实现！
●何厚铧呢排好忙，唔得闲搞呢Ｄ湿碎嘢！
●唔系啩，有嘢重要得过澳门治安，系乜嘢咁大单呀？
●咪就系前几日宣布取消新填海区同南湾湖区原有城市规划果单嘢！
●不如倾到呢到先，我要赶巴士，下次再倾过！
财阀横行 草民头痕 莫再赖人 快息民愤 |
|
