首先講吓塘釣裝備先,其實塘釣黎講,係一種好輕鬆寫意的釣魚,無需要帶一大堆行理呀...車仔呀..好似走難咁過關,自從橫琴開了關口之後,讓澳門的釣魚人又多了一個選擇,還算不錯喇,最起碼安安全全,無需要磯釣那種的辛苦,但我不是否定磯釣呀,本人也是一個磯釣的超愛好者,但本專欄係講塘釣,那就繼續講講吧!
一般而言,在池塘作釣,其實使用12呎的1~2號竿就可以應付了,但觀察大部份釣友都用15~18呎,咁~其實都無咩所謂囉!有人鐘意開細車,有人鐘意開部2000cc車,投其所好,開心就得喇!最主要我點解話12呎好呢,因為塘的範圍有限,碰到假期時人迫人,好易竹撞竹.
至於魚絲,絲身一般用3號比較差唔多喇,能攻能守,釣鱲唔會太粗,釣鱸又唔怕太幼,但絲腳用太細釣鱸就危險d囉,5號會安全上魚機會大d,唔係話咩嘢,需然高手可以用1~2號釣上好幾斤魚上水,但也要看魚種呀,鱸魚由於鰓好鋒利,4號以下絲腳~~啪~~一吓洗鰓就冇喇,鱸魚會跳出水面洗鰓,這一煞那也是最易絲腳碰到鰓...至於鱲魚就用細絲都唔成問題,1~3之間都有人用,無需太刻意計較,其實釣塘,最重要就係個塘d魚開唔開口呀!您信唔信呀,好多魚塘都係下午4點後至開口,因為塘主應該都會在未天光時餵食過魚飼料,比d魚食飽早餐先,要等到下午至肚餓呀!所以釣到3點幾都冇咩收獲想走人的朋友,幾大都頂埋到5點呀.
魚餌方面,每種魚的胃口都唔太一樣,並且隨著天氣,水溫,都會對食物產生反應,應該多帶備幾種,例如生蝦,死白蝦,重殼蟹等
釣池塘所用的浮標,道理來說,應該用長型的池釣浮標,吃水重量在1.5錢為適合,但好像澳門都比較多人用浮波..冇所謂啦!又係哥一句,投其所好姐!
今日暫說到此~預祝爆箱!
