四月三十日 ... 陰 , 陣中有雨
話說想左好耐要去釣魚 , 問晒咁多個師兄都無個得閒陪我去 , 咁唯有我兩公婆二人成行啦 .
一早起身 , 個天仲有毛毛雨 , 老婆已經問 , "還去嗎? " , "去 , 做乜唔去呀 , 落大雨都去呀"硬住頭皮咁答 ^^ ...
由於真係未試過無人帶路咁去釣魚 , 驚驚地咁出左關 , 但係非常順利咁就係褔海上左部麵包仔 (多謝晒 Dally 哥同肥仔哥教路) , 未上車佢就話西湖一百 , 我見佢都幾好樣 , 就同佢話明記啦 , 佢就話來回八十 ... ok , GO!
去到明記 , 個塘無人 ... 好呀 ... 我地為玩 , 唔會阻到人地條線呀 ...
開杆(生日禮物... 嘻嘻) , 新杆 , 第一杆 , 第一拖 , 傳魚訊 , 抽 , 中 ... 上水 ... 八両星驢 ... 當我每一杆拖都有魚訊 , 一直拖到九點幾 , 其它魚友終於都黎到明記啦 ...
我一直係咁拖 , 杆杆都抽 , 扞杆都中的同時 , 旁邊有位大叔魚友一直都未有魚上過水 , (其他魚友都有黃腳同星驢中過啦) 見到佢咁情況 , 我退出個魚渦 , 俾佢釣啦 , (結果佢係我同樣地方都係釣唔到 , 只係最後呀明老闆俾左條星佢) 我地就轉地點 ... 諗住釣到星驢以外的魚 ...
老婆轉左地點 ... 拖左四五下 , 抽(由於佢超新手 , 之前己經亂抽左幾十次 , 我仲以為佢又係錯) , 中 , 行線比D星星勁喎 ... 慢慢帶上水 ... 紅色 , 嘩 , 原來明記星星塘都有紅鮋ga ~ 咁我又好努力咁係差唔多位置地拖左兩個鐘 , 蕉 .............. >_<
係咁 , 蕉到三點 , 唉 , 都係返去個星驢渦啦 , 去到 , 又係一落水 , 一拖 , 又抽 , 抽左四五條 , 過晒手隱後 , 諗住走啦 ...
仲有隻蝦係個鈎度 , 行遠少少拖多下先 ... 傳魚訊 , 抽 ... 咦 ... 唔出拉力 , 唔通中垃圾 ? 好快就上到水 ... 哈哈哈 ... 三両黃腳都食即食生蝦 ? 個鉛頭鈎都有佢半條魚咁長呀 ~ 哈 ... 最尾一杆中D咁野笑到死 ...
好啦 ... 咁就開開心心拖左一日 , 我地一條星都無拎走 , 咁係拎左條紅鮋都條三両黃腳 , 呀明老闆話 , 三十二條星星換兩條盲鰽我喎 ... 如果我唔係轉左地點 , 你又好想釣到星鱸 , 你去明記啦 , 係入水口 , 你全日都唔駛停手 ga ...
全日洗費 ~ 我同老婆塘費要一百三十 , 車仔佬結果收少左我十蚊 , 係七十蚊搞掂 ... 二百大元玩一日
點擊看大圖:DSC03339.JPG
點擊看大圖:DSC03345.JPG
點擊看大圖:DSC03347.JPG
