查看完整版本: [-- 废除城市规划 市民肉在俎上 忽来南柯一梦 愿梦不会成真 (转自讯报) --]

-> 澳門有什麼好玩 ! -> 废除城市规划 市民肉在俎上 忽来南柯一梦 愿梦不会成真 (转自讯报) [打印本页] 登录 -> 注册 -> 回复主题 -> 发表主题

jackie 2006-09-03 20:46

废除城市规划 市民肉在俎上 忽来南柯一梦 愿梦不会成真 (转自讯报)

■老冯,上个礼拜你话何厚铧公布取消新填海区同南湾湖区原有城市规划果单嘢有嘢讲喎,有咩料先?

■我边有咩料讲吖,之不过早排睇完行政长官嘅废除城市规划公布,忽然间发咗个梦,疑幻疑真,谂住同你分享吓!

■咁你究竟发咗个咩梦呀?

■呢个梦就特别喇,梦里面见到几个大官见到几个大资本家,同埋好多好多美金,仲有一张台,不过好奇怪,啲钱唔摆系台面,净系摆晒系台底!

■咁果几个大官同大资本家系边个嚟架!

■你知啦!澳门大官一箩箩,所以发梦就更加唔清楚,记忆中有两个男性大官,其中一个成日上电视闹人,另一个成日畀人闹!另外有两个正值壮年嘅女资本家,一个老态龙钟嘅有钱佬,佢地姓乜我都唔记得,印象中大官同大资本家都系同姓或者夫姓相同。

■算喇,你记人咁差,不如讲吓梦境内容。

■话说五人坐咗喺一张四方台前面,大官坐埋一边,而大资本家就坐咗系大官前面,男资本家坐中间,而两个女嘅一个就对男资本家俟身俟势,而另外一个就玄坛咁嘅面,配合番男资本家嘅面色。佢哋一人一句,一时又话起摩天大厦,一时又话要临海大厦,一时又话澳门,一时又话氹仔,一时又话为咗公众利益社会和谐牺牲咗几多,一时又话为咗世界文化遗产又放弃咗间屋又放弃咗个厂,结果一轮来回之后,大官就面露难色咁话:“ ... ... ”

■话乜嘢呀?

■得我饮啖水先,大官就面露难色咁话:“我知道你地帮手,让咗啲烂屋烂厂出嚟,我亦谂住帮你地搵块好地,所以我一早就公布咗你需要置换嘅土地唔会公开地点,话系为咗公众利益,虽然呢句废话连我自己讲完都唔知自己话乜,不过好在啲传媒帮手,所以就顺利过骨,而家你地唔系要地咁简单,你地要系有规划嘅地段前面填海,你地要喺本来有规划嘅地方起座六十层嘅摩天酒店,我点帮你呀?”老资本家就话喇:“头头,大家三千年前是一家!你无理由做唔到嘅,反正你隔离个马仔都讲惯动态微调前瞻性啲废话咯!就叫佢做多一次废人,帮你起草废咗果两份规划咪得啰!你果份恩情我马上报答!”言语间,大官脚下有异物移动,原来台底有尺几两尺高嘅美金正由老资本家推紧过好畀大官!呢个时候,大官双眼一厉中官,中官马上面色一变,马上问大官应该点样草议废规划嘅文章,大官即系大官一句就点醒中官:“话畀市民知,有啲民间声音批评我地成日动态微调前瞻性地规划都市,话我地准备不足会有后续问题,而我地亦按实际需要成日修改,所以我地为咗公众利益,无谓要市民成日睇政府公布,对于我地嘅改动仲可能心生不满,所以政府决定取消规划,令各位商界朋友可以自由发挥。”中官办事果然有效率,马上打好咗大官嘅说话仲呈畀佢睇,大官即刻敲佢果头:“驶乜讲咁多呀?只需要话(为咗公众利益,所以政府决定取消规划。) 你慌传媒朋友唔会帮我地演绎咩!好喇,老同,我地干杯!你地两间酒店开幕,记得搵我剪彩呀?”老资本家就话:“当然啦!你咁懂得和谐,咁着重公众利益!”中官同大官耳语道:“废除规划以后,我哋以后仲可以搵多啲和谐,创造多啲公众利益”!大官话:“多嘴!”咁我就吓醒咗喇!

■老冯!我觉得你呢单嘢若有所指!

■你点谂我唔可以阻止你!不过“据说”澳门大官一向依法施政,因此好少贪污,我意思系好少听到张裕指控佢地贪污,所以梦境毕竟系梦境!希望唔会成真啦!

财阀横行 大官求银 齐齐骗人 不理民愤


查看完整版本: [-- 废除城市规划 市民肉在俎上 忽来南柯一梦 愿梦不会成真 (转自讯报) --] [-- top --]



Powered by PHPWind v7.5 SP3 Code ©2003-2010 PHPWind
Time 0.008029 second(s),query:1 Gzip disabled

You can contact us