過年陪屋企人出外無得釣,見到會內各個兄弟三杯破紀錄,個心痕到出汁。初十歸位,霸王上弓摱船邊出三杯,初時分天氣晴朗,水平如鏡。去到三杯首先飛到尾島搶左年初四的白蠟記錄位唸住博翻幾口白蠟。上到去都幾理想,主流系釣位面前2桿附近經過,拉動腳下反撥流慢慢帶出,一個比較好的流況,初初都中到幾條金鼓,但係水下無臘魚咬口,九點幾左右提前起左東北風,面前釣位抄起好高的水花,涌亦起到1.5-2米高度,6級陳風,個位吃正東北,比較難釣。於是轉去東南向海方向試試,但係風浪+漲潮流水,水流壓邊火箭,慢慢變換釣組,甚至一度變態到15g中通鉛+1號浮波先可以基本穩定住釣組在腳邊唔被沖走,但係試釣都係繼續中金鼓。
東南面橫風好勁,控桿好辛苦,走去向南方向散石大炒位置發掘風被山勢擋左無甘勁。於是走過來試下,之前聽講釣過的朋友介紹系散石外系7-8米深,去到用2號轉環+1號遠投波,一尋腳均勻兩粒1#咬鉛,打算線組定左6米固定負浮放出去,但係丟落去發現流急和抄涌太勁,如此負載居然都係唔沉,一狠心用到10g中通。丟落去釣組才慢慢下沉。我自己的標點系定系大炒白尾,散石群口,4-5米散石底跌落7-8米跌級的邊緣。開始試釣,在3桿內散石底卡底幾次,換下手法兜下釣組,等線組出外再放沉,後尾基本都唔會卡底了,試放左幾竿后突然一下拖桿尾,力度好蠻橫,心想中白蠟了,大約弓左十幾秒上水,原來系2斤多藍尾黑沙一條。有魚,即刻信心歸位,繼續打粉收放,釣組去到散石外開始負載滿沉,行行下就唔再出了,試下桿頭,有魚,大力抽中,G4 2#滿弓,拉回頭大約1個桿位,條魚大概見到暗礁群,突然爆發衝向左手3桿遠的一群暗礁,我自己後傾弓盡但係支桿還繼續去落到手把,眼睇睇條線拉入暗礁區割線。好卵蠻的力度啊,比起以前自己中過的大白蠟還要勁
。
後尾繼續以此法放流釣,陸續中到有7口魚,但係部分不幸是在暗礁邊吃中,一下就割左,最後只收穫左3條藍尾黑沙,最大一條約45-47cm,3斤幾重。
今次渔获唔理想,但系收获到极端天气下三杯的一个新玩法,以后为渔获多样技术保障。另:大炒位里的藍尾黑沙真係好好力,好有手感。
[ 此帖由lfyyy在2018-02-27 17:18重新修改 ]