好多年都無坐船大船出島玩 , 難得今個月有少少時間可以去釣魚 , 而橫琴同澳門又實在釣到無曬野玩 , 點都要搵返 d 新意思 , 新感覺返黎 , 所以今年暑期第一站要去既地方 ... 就係桂山 ~~
晨早七點我地就衝關 , 雖然搭八點八既船 , 但點都要預多少少時間 , 而且仲要去朝陽街市買生餌釣斑之用 , 係街市發現有好多鬼頭刀 bb , 仲有幾條鯊魚 ~ 真係想問佢可唔可以淨係買棚牙 ^^
好快我地就上左江華二號 , 直奔桂山島 , 可能係船度我地有 nds 打既關系 , 唔覺唔覺就已經到左桂山 ~ 好耐都無踏足過既桂山 la ~~ 至少都有 3 ,4 年無黎過 , 好彩基本建築物無變 , 只係.... 感覺有點冷清 , 同以前繁華既景況相差好遠 , 不過最緊要有魚釣就得 la ~~~~ 而我地亦都好快搵到旅店安頓好一切 , 然後舒舒服服咁出去食 d 野 , 享受一下環境 ~~真係難得可以坐係岸邊 , 一邊吹住海風 , 享受陽光 , 呢種感覺真係好 ~~
食完野 , 我地就沿市區行左一陣 , 以前既釣具店就無曬 la , 不過就有一檔賣釣餌既 , 原來係可以預約生餌 , 青紅虫等 , 早知唔駛托過黎 la ~~ 下次book 定算數 , 咁又可以慳返唔少行李~ haha , 不過真係好冷清 , 以前邊有咁靜 ga , 周街都係人 , 甚為熱鬧 , 而家行街都無乜人理 ~ 連食店都比較少左 , 真可惜 ~~~
話咁快我地就搵到車 , 可以出發去釣魚 la , 第一站決定去船廠附近既一個內灣釣下 , 而呢個釣點我又未去過既 , 都係司機推介 , 不過無所謂丫 , 反正都係為左玩 , 邊度都好 ~~~ 唔好蕉就得 ^^
一去到我同 pat 哥就開枝 "狗公竿" 出黎搵狗同斑仔釣 , 但係釣極都係無 .... 有點恐怖 ... 成個場基本上可以行得既位置我地都試曬 , 依然未見到有狗公既踪影... 唔係咁玩我呀... 我仲帶左好多狗虫黎喎 .... 不過算數 , 無狗玩就玩第二樣 ~ 係岸邊見到成群雀鯛仔 , 一於開枝爆軟手竿黎玩下先 , 玩左半個鐘到先釣得十條八條 , d 雀鯛既偷餌速度實在有點快 ~ 而走左去另一邊搞磯既龍五就好收獲過我地好多 , 有兩條似樣既火點 , 仲斷左一口斑 , 條斑都唔細 ga , 至少斤幾重 , 如果唔駛斷左既 , 今晚就有好野食 la ~~ 釣到咁上下 , 各人都返左黎碼頭位度休息下 , 而龍五就攞左我枝手竿係碼頭邊度用死蝦試下有咩玩 , 點知又真係有魚食餌喎 ~ 一抽之下 , 居然弓唔上 , 仲入石斷埋添 , 突然我地既戰意又提升左 , 一齊加入睇下有咩釣咁惡 la ~ 第一個中魚既係龍五 , 用新收到既 father's day 禮物係惡 d 既 , 中到既竟然係紅魚 ..... 唔係嗎 , 有 d 咁既野玩 ?? 望望對面個魚排 ... 唔通係走籠魚?? 係就發達 la , 走親都唔會少 , 睇黎今日應該會有 d 野玩 ~~ 不過大熱天時 , 仲要係中午時份 , d 紅魚肯食餌就真係有點過份 , 但勝在唔駛打誘餌 , 淨係一隻生蝦仔 or 死蝦就有野釣 , 都幾好 ~ 上完條紅魚 , 好快就輪到我中 , 由於我堅持用枝軟到極既4.5米手竿黎玩野 , 中到個 d ... 全部都拉唔起既 ... 唔係入石就斷 ... 超激氣 , 迫於無奈之下 , 都係開返枝制霸技出黎廢事斷咁多魚俾人伸落海就唔好 la ^^ 不過係未俾人伸落海之前 , 我就已經自已跳左落海先 ~ 因為用枝手竿個時中左條紅魚 , 玩左一輪最後都係俾佢入返石 , 一怒之下 , 決定落水摸返你上黎 ~ 順便游下水消暑嗎 ~ 但係點知落到水差一呎摸到魚勾個時 , 竟然甩返個勾出黎 ... 作死你嘛 , 落左黎先玩 d 咁既野 ~ 之但係我跳左水玩摸魚之後 , 唔駛五分鐘又有魚釣喎 , 呢個釣點真係有點得意 , 咁搞法都有魚釣 ~ 係咪咁堅呀 ?? 而最估唔到既 , 係龍五中到盲鰽 , 係海度中盲鰽已經好少有聽過 , 而更得意既係連中兩條添 , 唔係又係走籠魚呀 .... 盲鰽都要係魚排養咁揼本 ?? 仲有咩走出黎添 ~ 等我地釣鬼曬佢都好 ~ 隔左一陣 , 到我又中返條盲鰽 , 感覺上咁鬼似釣塘既 ... 唔通黎到咁遠 , 都仲係得橫琴三寶釣 .... 而且又真係搵口立線都無 ga 喎 , 食親埋黎唔係盲鰽就紅魚同埋斑仔 , 有冇咁得意呀 ~~
好快好快 , 咁就釣到六點幾七點 , 都係時候走人返去食飯 , 總結一下今個下午既釣況 , 真係非常估唔到 , 大熱天時幾十度 , 都可以未停過咁中魚 , 當然起唔起到就另一回事 la , 但真係幾密手 , 最衰 d 斑仔唔大條 , 睇黎都係要等遲 d 黎先有大斑釣 ~ 而且我地斷既...甩既 ...入石既 , 比我地上到水既魚還要多 , 三毎人斷左至少二十口 , 實在驚訝不已 ..... 大家下次不妨試下呢個釣點 , 話唔定又會有意外收獲 ga ^^
返到去食完晚飯 , 都成九點幾 , 去按返一個鐘腳同身先 , 唔係散都似...... 按完之後 , 我同 pat 哥就繼續出去搏下命 , 睇下岸邊有冇紅鮋同大班釣都好 , 而且夜晚既流水同水位都好適合 , 唔去又真係哂左 d , 捱眼訓都去玩陣先得 ~ 我地一路沿住情侶路去到尾 , 之前司機話個度都幾好魚 , 又試下好唔好玩先 , 而我地亦都出動到係朝陽街市買既大海蝦做餌 , 一係唔食 , 一食就大野 , 果然真係有魚信 , 第一口出現既係 pat 哥 , 拉波行左陣 , 埋到石邊位就抽佢 , 點知抽竿後發覺隻蝦咬左條尾 ... 唔係呀... 死立仔... 搞 d 咁既野 ?? 跟住輪到我 ... 撻左隻蝦落水都唔夠十秒 , 突然極速沈波 , 出盡力抽佢 , 作死... 唔駛半秒斷左 ... 仲要斷線身 , 係零圈位對上斷左.... 駛唔駛咁惡呀.... 5 號腳都搞你唔掂 ... 仲點釣呀 , 跟住釣多一陣都無曬野咬 ... 唯有返房訓 ... 可憐我仲斷左兩粒貴浮波 ... 咁又無左百幾蚊...
第二朝六點幾我就同龍五再次出發去返尋晚斷魚既釣點度釣 , 為報一斷之仇 , pat 哥就係房度訓多陣先 , 當我地去到釣點 , 可惜流水已經唔o岩 , 水位唔夠 , 玩左差唔多兩個鐘都係無任何魚訊 , 咁既釣況 , 睇黎我地都係搭11 點早班船返去算 la , 就係我地收曬竿一路行返酒店既途中 , 係岸邊居然發現到有海狼 , 仲要係幾條一群咁添 , 好彩我有帶假餌係身o者 , 但得枝磯竿.... 唯有用磯竿拋假餌頂住當先 , 試下佢食唔食都好 , 呵呵 ~ 拋出去第一竿就即刻中 , 可惜俾佢跳水洗用左 , 雖然唔係大條 , 50 cm 左右 , 不過發現到新玩意 , 實在太開心 la , 不過更意想不到既.... 係居然睇住條紅鮋仔衝上水面咬我隻假餌 ... 我都仲未黎得切抽竿 , 已經俾佢入左石 ... 唯有落水摸返佢上黎 la , 好彩呢度好淺水o者 , 褲都未駛濕就摸到 , 但已經甩左勾 , 執返隻假餌 , 算你好彩 , 眼見而家用緊既架生有點問題 , 都係決定返房執過套假餌架生出黎 , 順便叫埋pat 哥一齊黎玩 ~~
大約45 分鐘後 , 我地又黎返中海狼既位置附近 , 戲肉終於黎 la ~ 原來呢度有大量海狼潛藏係岸邊 , 呢條情侶路又長 , 大把位可以釣 ~ 而 pat 哥亦都超快手咁中左條海狼 , 60 cm get !! 見到棚咁既死人牙 , 實在得人驚 , 咬一啖都死 .... 肯定興奮過 d 紅鮋好多 , 而我亦都唔執輸 , 即刻中返條 , 呢條細 d , 45 cm左右 , 不過發覺 d 海狼都唔係想像中咁死口 , 雖然攻擊次數多 , 真正咬中勾既都係少 , 每中一條 , 都要花好多心思同佢鬥智先令到佢咬中勾 , 不過呢個過程真係好好玩 ~~ 學到好多新既知識 ~ 更興奮既係 , 中到紅鮋 ~ 一條就用 b太60中既 , 另一條大既就用 livebait blade 24g 中既 , 兩條紅鮋都要出盡九牛二虎之力先上到水 , 海既紅鮋的確比塘既好力好多好多倍 , 又要死頂佢唔俾佢入石 , 而岸邊 d 淺石又多又密 , 簡直每秒都觸目驚心 ~~~
最後我地上水既總共係7 狼 2 鮋 , 咬口至少超過60 口以上 , 完全估唔到咁既地方會有咁多狼同紅鮋 , 下次再黎 , 都係淨係帶假餌算 lu ~~~ ^^
點擊看大圖:1.jpg
點擊看大圖:2.jpg
點擊看大圖:3.jpg
點擊看大圖:4.jpg
點擊看大圖:5.jpg
點擊看大圖:6.jpg
點擊看大圖:7.1.jpg
點擊看大圖:7.2.jpg
點擊看大圖:7.3.jpg
點擊看大圖:8.jpg
點擊看大圖:10.jpg
點擊看大圖:10.jpg
點擊看大圖:11.jpg
點擊看大圖:12.jpg
點擊看大圖:13.jpg
點擊看大圖:14.jpg
