◇克仔星期四有無睇報紙呀？
●有睇，仲睇到澳門遲啲有個經人委員會添！
◇咩野驚人委員會呀？有乜咁驚人呀？我都唔係講呢樣！
●唔係果個驚人！係經濟委員會同人力資源發展委員會合併成為一個會，所以簡稱為經人委員會，不過我相信佢遲啲實會有啲驚人舉動，因為睇吓謝志偉同何厚鏵一齊發火，就知道事有蠱惑！
◇我問你有無睇報紙，就係想問你知唔知佢地做乜突然間發火，何厚鏵發火就司空見慣啦！但係一向中立而又斯文嘅謝校監，點解突然間好似轉咗性咁，居然扯火：「有人要撈取政治本錢，為尚有三年嘅行政長官選舉同立法會選舉造勢，不斷批評政府；指出政府嘅施政都經過深思熟慮，有一定科學理據，同時顯示出行政長官「以民為本嘅施政理念」，就係唔明啲政客就係要批評改革步伐太慢。」
●我認為你誤會咗謝校監，謝校監又誤會咗何厚鏵！
◇我誤會咗謝志偉？唔係掛？
●你當然誤會咗佢啦！澳門嘅學術界，大部份傳媒同社團老早已經被何厚鏵為首嘅行政機關統戰，所以謝校監嚟到澳門擔當澳門大學出任高職同時又被委任多個公職，無理由唔知道要幫邊個講嘢！以前佢未露出真面目，只不過係時機未到，依家時機到喇，所以就受命於何厚鏵而出動，就好似我舊年同你講過，果個居民生活素質研究中唔包括居民對政治活動嘅參與度調查，已經可見主事人謝校監並非以學術為中心而調查，而係以聘請者為中心，因為世界各國對於居民生活質素調查必然包括政治參與度，因為資本主義社會中人人都有參與政治權利，而政府亦樂於見到多元政治，只有澳門呢個專制式資主本義社會，先至會將政治視為忌諱，當有一啲非親政力量講及政治，馬上有一大堆所謂「專家學者」口誅筆伐，甚麼別有用心？有外國勢力支持？意圖搗亂一國兩制等語言暴力出現，主要意圖就係唔想其他政治力量分薄行政長官獨攬嘅政治力量，所以謝校監只係芸芸「專家學者」其中一份子，唔使驚訝！
◇你話我誤會謝校監，咁謝校監又點誤會何厚鏵？
●佢呢個誤會就大囉！佢以為大讚何厚鏵施政有科學有理念有深思熟慮就可以幫佢嘅施政失誤打圓場！誰不知何厚鏵自已都話施政有失誤，而且政客們批評得越厲害就政治得分越高，言下之意就係批評佢嘅政治人物講啱咗佢施政失誤，而何生亦明白居民普遍都睇到有關失誤，只不過敢怒而不敢言，結果就係謝校監諗住為何厚鏵袒護不成，反而被外界視為讒臣！
◇不過話時話，你認為何厚鏵今次指罵嘅政客又係邊個呢？
●呢排邊個對佢傷害最大吖？
◇唔知喎？
●係陳同吳兩位人大囉！
◇點解呢？
●因為何厚鏵會同檢察院院長何超明係六月十六日同漁人碼頭五月八日發生命案嘅家屬會面，在場人事包括陳、吳，雙何對此案均表示關注，並認真聽取了死者家屬反映的重重疑點。
◇係咩，有單咁嘅嘢咩！有問題喎，咁即係行政干預司法，立法又干預司法！
●無錯喇，何厚鏵甘願冒險，相信係受壓於福建團體同兩位友好議員，而一次咁冒險嘅會面，只係換取咗死者家屬原訂於六月十七日上午九時開始嘅靜坐活動暫時取消，不過當時傳媒中並無對雙何呢次甚具問題嘅會面加以責難，所以都算和諧收場；誰不知兩個禮拜後，一干鄉親父老帶同金銀衣紙到漁人碼頭進行大型路祭同法事，而擾攘數小時期間，連應漁人碼頭報警到場嘅警察，亦只夠膽遙遙相望，可見該等鄉親嘅影響力不同小可，而鄉親們呢一次嘅行動，已經嚴重打擊何生威信，相信雙方角力，陸續有來！以上嘅只係講到何厚鏵發火原因其中之一，但係講到謝校監指有人為選舉造勢嘅問題，我仲有啲嘢想講，不過要下個星期先至得閑！
◇約定你喇！
公權不行 草民頭痕 莫再賴人 快息民憤
