以下文章,來自isoLINK 海磯研 » 磯釣研究的一個關於"何為頂口，何為不頂口...?"的討論(1),現我轉貼其中一位老師-- alvis佚名的答話(2007-07), 頂口只有兩種, 一種是人們認為魚類進食時覺得有問題, 就算咬餌後都會放口。
另一種是人類一廂情願認為魚不進食就是釣組上有不自然地方，所以不進食。
當然如果釣餌位置非常有問題, 沉降或懸浮時狀態非常有問題, 又或天氣/環境/時間等問題,
魚都可以不進食。 呢類情況同頂唔頂口無關。 魚類進食時機和意欲跟頂口無關!
釣組設定和手法對魚訊表達有關, 魚訊表達後和掌握時機是釣人問題,
跟頂口又有無關系呢????
有一種情況是釣人明顯見到魚訊出現, 但無辦法掌握好揚竿時機,
甚至見浮波被拉沉一段時間後被放開, 好多人稱為頂口。
實際是釣人本身掌握能力出問題, 對本身釣組設定和了解有問題,
魚來進食都不能好好處理, 往往只能能夠等"拉竿式"魚訊,
主動變成被動, 人蠢唔好意思講就變成魚聰明, 結果咪只好話頂口。
魚有無數理由進食與否, 唔食就唔會有魚訊, 當有魚訊而釣人無辦法處理,
應唔應該叫頂口???? 如果等拉竿以外就唔識揚竿時機, 仲算唔算釣魚???拉竿 = 其中一種最好最易理解處理的揚竿方式。
但釣魚並不是只得拉竿出現才作揚竿作釣方式。
留意一下台釣, 最精細的作釣方式, 往往魚訊只是一目甚至一間,
只怕無魚訊或者魚訊不現, 甚至因為份餌唔對嘴, 從無頂口一回事。
在磯釣上, 用長標的高手, 除了拉竿外好多時只需要一目的魚訊就揚竿,
關心既只是釣餌到唔到棚, 釣組控制上魚訊放大或者減慢的技巧。
更甚者, jigging 或者 light jigging 都唔會聽到有頂口出現,
點解磯釣時就時常有精口有頂口問題?????不同釣法擁有不同魚訊方式, 好多釣法表面上目標魚跟磯釣不同,
但係內容一樣, 問題係有無魚咬餌, 當魚就餌時釣手幾時要揚竿, 萬變不離其宗。
可能你會覺得黑鱲就餌會怕頂口, 但好奇怪 light jig 都會釣到,
魚在追食時就唔會有頂口出現! 同意嗎? 咁你可以想想磯釣時點樣刺激對象魚出現"追食"情況!
釣手了解到情況後就再無頂口情況出現, 同意嗎???
如果頂口和釣組有關系, 咁一定關釣手事而非魚事! (個釣組自已 set, 自已都唔了解, 邊個可以幫??)
魚只有生活模式同習慣, 基本上無思考能力同無乜智慧,
不過大部份人喜歡相信魚有智慧又聰明, 所以精口又怕頂口..... (自已釣到都成功感大 d )
你會發現大多數情況都聽到人講 : "果日條xx魚幾精口, 初時我個釣組又頂口,
見佢拉沉少少抽極都唔中, 後尾我又改個 xx 釣組, 食得幾爽~ 箭沉又拉竿~, 結果又比我釣到。"
成段說話只係話某日釣魚, 魚就餌, 初時處理不到, 後來手法/釣組經一定改動, 有魚訊並將魚釣上。
無晒 d 形容詞反而仲易睇得明。如果用人角度去睇, 我個人唔太同意魚既 size 影響到食餌情況。 影響食餌情況離不開幾樣野....
1. 該種魚攝食模式, 略食性重魚種, 不論大小都衝過黎食餌。
2. 對象魚活性, 視乎當時水流同季節。
3. 魚越大越年長, 攝食經驗越多, 應該越大食野越小心。
-------------------------------------------------------------------------------------------------------------------------------------------
另外, 提到點樣吸引對象魚追食你口餌, 你手上可以利用到工具亦只得幾樣.......
1. 利用釣組和手法 - 晃餌, 但係大前提要你口餌到達釣棚可以出現對象魚面前
2. 利用誘餌, 同樣大前提要做到誘釣同調
3. 利用海流, 魚唔靠近標點就要將釣餌送到魚面前, 釣餌在魚面前流走一樣可以刺激到魚有反應
4. 利用標點, 例如吸入流/湧升流/反潑潮...等, 食物會沖積或停滯於這類標點,
魚喜歡停留這類標點等待食物, 問題只是你能否將釣餌送入這類標點
以上幾種都是磯釣時常用甚至必備的手法, 問題只是作釣時你面前有無對象魚,
並且你有無盡力合適地利用過以上工具及技巧。
-------------------------------------------------------------------------------------------------------------------------------------------
有無發現常見會有頂口或者精口既對象魚同釣場大多有共通點????
通常淺場或者無風無浪, 微風弱流等釣場都時常有 "頂口/精口" 情況, 可唔可以理解為呢類釣場
較難處理, 而非魚精口??? 而呢類釣場又較多人喜歡釣黑鱲一類魚種, 呢類釣場下, 一方面可能
較難處理, 另一方面魚既活性方面又會唔會受阻? 對象魚活性低時又應該用咩方式處理?
釣組相對地係咪要將魚訊反映盡量放大? 定應該按兵不動只等拉竿?
-------------------------------------------------------------------------------------------------------------------------------------------
有無發現相同釣場釣況下, 若果釣到牛屎, 往往由最大條開始, 越釣越細?
若果釣黑沙, 則相反越釣越大? 黃腳或者白鱲就幾條都會差不多大細?
但係全部食餌情況都一樣.......點解呢?
除左生活模式外, 唔通有 d 魚越大越蠢, 又 d 又越大越精??
有 d 就成班走埋不論老嫩都唔蠢?在人的角度下 "頂口" 確實存在, 用於形容有魚訊出現, 但魚訊不明顯/確定,
或同時從中察覺得到對象魚將釣組拉沉或釣餌拉動, 而魚可能從中察覺有異,
將進食行為停止(即是放口), 從釣組中反映出來時, 便被稱為 "頂口"。
在魚的角度下 "頂口" 不存在, 魚只會有進食或者不進食的行為和理由,
亦有部份魚進食行為和習慣上會將釣餌 "含著" 一段時間或距離再作進食。
魚有無數理由進食與否, 同樣可以因為週圍情況忽然停止進食行為,
但這種忽然中止進食行為跟釣組上需要 "拉沉的阻力" 無關,
大自然中, 魚在海裡的食物有極大部份進食時會遇上更大 "阻力",
例如: 蠔粟, 甲殼類, 同類......每一種要進食時所費氣力都比拉沉一個釣組多上不知幾倍。
從釣魚角度去看 "頂口" 則存在不同看法,
有人認為魚進食時, 要一直到吞食出現(即釣餌要深入口腔甚至胃部), 方算是一種完整的進食模式。
亦有人認為當魚接觸釣餌一剎那開始就已經是進食模式。
以上兩種模式都可以經由釣組反映出來, 而當反映出來同時,
問題只是釣人能否閱讀這種魚訊並掌握到抽竿時機。
當然如果魚進食得 "深" 又 "狠", 釣人就算不懂揚竿時機, 還可以等到魚直接拉竿來感受出來,
但魚進食得 "淺" 又 "輕", 只要有魚訊可以反映出來, 難道就不能將魚釣上?
當中分別可能是我時常強調, 閣下在進行一種 "主動" 還是 "被動" 的釣法。
釣魚人, 往往看得到魚訊又釣不到才會有頂口問題, 看得到又釣得到又何來頂口? 只會話好釣。
----------------------------------------------------------------------------------------------------------------------------------
關於 "浮波" 跟 "浮標" 問題, 老實說, 當然首要視乎釣組調節, 但是兩者都會或需要一定的 "頂口",
如果你可以將頂口和魚訊關系聯想到一起, 便知道頂口不可怕, 沒有若干頂口的話,
魚訊甚至不能反映出來, 只要魚訊可以反映出來才能從閱讀中找出揚竿時機。
以目標為本的話, 浮標較好用, 從中能反映的魚訊和流況亦較多和清晰,
但以趣味性、悅目性、操作性和推廣性, 浮波則較優。(凸叟:我讀此文後,覺很有啟發性,稍後再試貼其餘幾位老師對"何為頂口，何為不頂口...?"的看法同大家分享.)
[ 本帖由arrowtsang在2009-06-16 18:29重新修改 ]
